البدايات دائما مهمة وغالبا صعب تتنسى … زى أول يوم فى المدرسة … أول مرة اشوف الكلية ….. أول مرة قابلت كل صديقة وزميلة ….. كل ده وحاجات تانية كتييييير محفورة في عقلنا ودائما نتذكرها اما بالخير أو ………. بس غالبا مع الوقت تكتشف أن الاخطاء اللى عملتها كانت مهمة جدا والخبرات التى اكتسبتها أعز الاشياء التى جعلتك تشعر أنك فعلا فى الحياة وبتكبر فيها ……حتى ولو كانت خبرتك عمل القهوة بوش علشان كده لازم نهتم بالبدايات و نركز فيها على قد ما نقدر عشان نستفيد منها و نتعلم من اخطاءها ابسط مثال ……. "اليوم" ……. كل يوم مختلف (يعنى السبت غير الحد غير الخميس ومافيش يوم زى التاني اه احيانا الاثنين يبقى شكل الخيمس بس ده لا يلغى انه اثنين بس بيستهبل ) و بما انه شىء مختلف يبقى هو ايه………..؟ .. بداية جديدة وفعلا ده دائما احساسى مهما كان اليوم مقرف بنام منتظرة بداية جديدة وأمل جديد و اقول امتى الصبح يجي حتي و لو هانام ساعتين…..(في الليل يحل البكاء وفي الصباح السرور) أول لما المنبه يضرب الساعه 6 أفط من على السرير جرى واشغل الاغنية المفضلة في ودانى على أعلى صوت المهم انا بس اللى أسمعها وده يعطينى احساس قوي بفرحة اليوم الجديد ويدفعنى للخطوة التاية وهي المطبخ ……… في الطريق للمطبخ الصالة و الشمس دخلت من احدى النوافذ بلطف شديد بصعوبة تلمسه يا دوبك تلغى ظلام يوم قديم وتشعرك بامل جديد علي الرغم من ان انفك تشم بقايا طعام الليلة السابقة و الفاكهة التي لا تزال على الترابيزة لكن هذا مهم جدا لكي تدرك أنه لولا امبارح ماكانش جاء النهاردة …….. بعد كده المطبخ وهو أطول مرحلة تبدا بعمل ألذ وجبة فى اليوم اللي مش ممكن تزهق منها ولو اكلتها بسرعة ما تتحسبش لانى اقضى فيه تقريبا نصف ساعة ولو مش ورايا حاجة ممكن اخذ النيسكافيه معايا للبلكونة .. وتفضل الكباية فى أيدى الأتنين وأنا متنحة (يعنى مسهمة ومش ممكن تاخد منى اى رد فعل غير أنى مرتاحة من جوايا) .. واجمل ما فى كل ذلك اني الوحيدة اللي صاحية اسرق اليوم من بابه واخذ كل حلاوته …………لان ببساطة وقت الصبح بدري .. لا ياتى في ذهنك اي شىء يضايق او تتذكر اى شىء…. ببساطة انت لسة فى مرحلة الاحلام .. وتفوق فجاة ان لم يتبقى سوى 6 دقائق تجهز فيها وطبعا مهما صحيت بدري لازم اتزنق في وقت اللبس يعنى ده من ثوابت المعادلة ……………….يعنى البراح تجده في الصباح
